Home

Drei Waggis sinn an dr Fasnacht 1957 am Morgen am vieri im Reschtorant Gränze (Luzärnerring) uff d'Idee cho, mir kennte e Waggis Waage grinde. Bis im Summer 1957 sinn wyteri siibe Glychgsinnti derzue gschdosse und per Grindigsversammlig im Juli 57 isch im "Hägemer-Quartier" e neye Waggis Waage namendlig "Basler Waggis" kurz BAWA entschtande. Sofort hett me d'Planig fir die erschti Fasnacht 1958 in Aagriff gnooh.

Am 24. Hornig isch es denn sowyt gsii. Nachem Morgeschdraich, wo bi +6.4° C (lägg isch das warm gsii) stattgfunde hett isch me sofort der Waage go laade. Am Nomidaag sind Temperature bis uff +11.3° C gschdiige und d'Basler Waggis hänn bi zwischezytige Räägefäll iihri erschti Fasnacht derfe gniesse. S'erste Sujet vo de Basler Waggis:

"2000 Joor Superblausch" (2000-Jahr-Feier)

An der Fasnacht 58 sinn bereits 50 Wääge der Cortège gfaahre und insgesamt 204 Glygge, Wääge, Guggemuusige, Schyssdräggziigli und Ainzelmasgge hänn offiziell dailgnoh.

Au hitte no, macht bi uns e Grindigsmitgliid aggtiv uffem Waage sowie am Vereinslääbe mit. Das erfillt uns mit Stolz und mir bligge uff e rächt langi Dradition zrugg.
image-6581412-a454403ead5d4eefa8f305303407e9b3.jpg